أغلبنا سمع أو مو أغلبنا كتار في بعيلتهم حدا عندو عقار آجار قديم و مبلغ الآجار بيكون مبلغ زهيد خلينا نقول ! شو القصة و شو يلي صار /
سنة 1952 ميلادية كانت الناس مأجرة عقاراتها بمبالغ ممتازة بهداك الوقت أبو 100 ليرة و بهل الحدود .. بهديك السنة العظيم طلع مرسوم تشريعي رقمو 111 قال هاد المرسوم بإنو العلاقات الإيجارية بين المأجر و المستأجر بتمدد بشكل حكمي .. طب غم علق المستأجر و ما عاد طلع و من وقتها و لهلق ب 2017 لسى في مستأجر علقان - كرأي شخصي ما بحسها علاقة إيجارية حلال يعني عم يندبح المؤجر بطريقة مخالفة للشريعة -
طلع كتير تعديلات على هاد القانون أخرها القانون رقم 20 لعام 2015 و طبعا بكل التعديلات كان في نص مادة بيقول تبقى العلاقات الإيجارية الخاضة للتمديد الحكمي على أحكام القانون رقم 111 .. بهل القوانين كان في مواد جيدة نسبياً للمؤجر أحسن من بلا الصراحة سمحتلو للمؤجر إنو يزيد الأجرة وفق نسب معينة - رح نحكي فيها بعد قليل - لأن على مر السنون - حلوة هي السنون عجبتني - اختلفت الدنية و الأسعار يعني أكيد لو فرضنا أجار عقار 100 ليرة بهداك الوقت هلق بيجيب شوكلاته توكسي - هي دعاية - بكل الأحوال خلينا بالمفيد
فالناس بقى سيد راسي يلي عندها عقار مأجر على الأجار القديم مكنهم القانون من شغلة ممتازة هي زيادة الأجرة بناء على تخمين الخبراء من قبل المحكمة ..
ف لو عندك عقار آجار قديم #فيك_تزيد_الآجار_بشكل_دوري عن طريق دعوى .. يتسأل مراقبون ( كل قديه في الواحد يرجع يخمن الأجرة ) قبل ما جاوبك على هاد الكلام بدك تحط ببالك الموضوع بيرجع للخبرة الفنية يعني رأي ا لخبراء ممكن يكون أخر زيادة زودتها عالية تنزل بس ما بظن غالبا بيكون في زيادة و عفكرة فيه المستأجر كمان يرفعها
كل قديه ؟ على حسب قانون الأجار الجديد كل 3 سنين فيك ترفع دعوى التخمين هاد الكلام بالمادة 6 من قانون الإيجار رقم 20 لعام 2015 يلي إجا فيها : " ب. لا يسمع الادعاء بالغبن وتحديد الأجرة إلا مرة واحدة كل ثلاث سنوات وتبدأ هذه المدة من تاريخ التعاقد أو من تاريخ الاتفاق الرضائي الخطي على تعديل الأجرة أو من تاريخ الادعاء السابق" .
الزيادة وفق نسب معينة من قيمة العقار حددها القانون بالمادة 1 فقرة د كالتالي :
سكني 5% بينضفلها 20% من قيمة الفرض إذا كان داخل الفرش بالعقد
6%ليلي مأجر لممارسة مهنة حرة أو علمية - متل مأجر محامي -
7% للتجاري أو المأجر للدولة أو للصناعي أو لمهنة حرفية أو لأحزاب أو نقابات أو جمعيات
8% العقارات المؤجرة لتستعمل كمدارس
#كيف_بنطلع_المستأجر هلق هون بدي نبه على شي أكيد مو بتلت حركات متل ما كتبت بالعنوان القصة مو لعبة شطرنج ! القانون حط حالات معينة إذا انطبقت حالة من هالحالات فينا نتحرك بدعوى إخلاء طبعا ما رح نغوص بالتفاصيل التخصصية لأن الشخص العادي مو المحامي ما فيه يعملك دعوى بناء على احكام أحب المواد القانونية الجديدة بقانون أصول المحاكمات المدنية لعام 2016 يلي هية المادة 105 و ما رح نفوت بتفاصيل موضوع الإنذارات للمستأجر نحن عم نحكي بشكل عام متل ما قلت .. فشو هية #الحالات ذكرتها المادة 7 من القانون الجديد وقالت :
1- إذا ما دفع المستأجرة الأجرة بس صار وقتها و استحقت خلال 30 يوم من اليوم يلي بيلي تبليغه بضرورة الدفع ببطاقة بريدية أو إنذار كاتب عدل .
2- إذا المستأجر أساء استعمال المأجور خربو أو هدو أو استعملو استعمال بيتنافى مع عقد الإيجار أو زيادة على العقد و شطط فيه
3- بالنسبة للعقار السكني إذا المستأجر تنازل أو أجر العقار كلو أو جزء من بدون إذن خطي من المؤجر أما التجاري أو المستخدمة لمهنة لازم قبل ما يتنازل المستأجر عن العقار يبعت إنذار أو بطاقة بريدية للمؤجر يخبرو فيها عن السعر و هو بيكون للمؤجر الأولوية في حال حب يشتري عقارو من المستأجر ناقص نسبة 10% من المبلغ - هههههه - أو أنو يوافق وياخد نسبة 10% من قيمة العقار . بيستثنى من هالفقرة الشي يلي مأجر باختصار للدولة
بس بيحق للمؤجر مباشرة يرفع دعوى تخمين على الأجرة .
4- إذا طلب المالك المستقل إنو بدو يسكن بعقارو المأجر .. بس في شرطين - وين رايح بهل العجقة - : أول شرط يكون العقار السكني شقة وحدة و ما يكون مالك شقة تانية قبل ما يطلع هاد القانون ، تاني شرط يكون صرلك مالك هاد العقار سنتين على الأقل
- يعني يكون العقار تبعك شقة وحدة و ما تكون مالك غيرو خلال السنوات الماضية قبل ما يطلع هاد القانون و تكون ما تملك مالك عقار تاني لمدة سنتين على الأقل .
((( هون كمان في استثناء ))) ما يكون المستأجر موظف أو عامل بالدولة أو عسكري من يلي ما بتنتهي خدمتن بمدة معينة عدا الوفاة #إلا إذا كان المؤجر كمان موظف بالدولة أو عسكري و رجع على البلدة يلي فيها العقار المأجر بسبب نقلو أو إحالتو على التقاعد أو مسرح لأي سبب أو عيلتو بعد ما اتكل رجعت بس بشرط يأنذرو بالاخلاء قبل 3 شهور
#مع_هيك ما فيك تخلي المستأجر بالحالة السابقة و الشروط المتوافرة عندك انك عسكري او موظف إذا كان المستأجر استشهد أو مفقود بالحرب أسير و كانت عيلتو بالعقار المأجور
5- إذا قرر المالك يهد العقار ويبني محلو عقار جديد من عدا العقارات المؤجرة للدولة الا بحالة رح تنهد أو انهدت شرط تكون أخد قبل رخصة بناء نظامية ( طبع في مادة قالت بس ما تخلص بناء بدك تخلي المستأجر يجي يستأجر بالبناء الجديد بحصة قد الحصة يلي كان قاعد فيها - لازقلك لازقلك - و مع هيك إذا ما قدر المستأجر بعد ما خلصت يستفيد من العقار بدك تدفعلو تعويض 40% من قيمة العقار )
6- إذا قرر صاحب الأرض الخالية من البناء و مخطط ينبنى عليها أو مالك جزء منها يبني بناء جديد بالكامل بعد ما يكون أخد رخصة بناء نظامية ( و كمان نفس المادة السابقة بدك تخلي المستأجر يجي تحطو فيها طالما في امكانية لهل الشي و بحصة قد الحصة يلي كان مستأجرها و فكرة إذا ما قدر المستأجر بعد ما خلصت يستفيد من العقار بدك تدفعلو تعويض 40% من قيمة العقار... )
7- إذا كان المستأجر مالك لعقار صالحة يسكن فيها و خالية أو مأجرة كمان و بيقدر يخلي مستأجرو .
8- إذا المستأجر بنا بشكل مستقل بناء بيصلح أنو يسكن فيها و أجرها لغيرو أو باعها و تصرف فيها .
9- إذا ترك المستأجر العقار بدون سبب لمدة سنة كاملة بدون ما يرجعلو خلالها بطريقة بتدل على انو استغنى عنو ( هي بالنسبة #للمستأجر_يلي_ٍسافر )
10- بالنسبة للعقارات يلي ملكية مشتركة الشريك يلي قاعد بالعقار بموافقة أغلبية الشركاء متلو متل المستأجر بتخليه بحال ما دفع الأجرة خلال مدة 30 يوم من تبليغو متل الحالة الأولى .
و طبعا إذا كان العقار مأجر للدولة بدك تبلغن إنك رح ترفع عليهن الدعوى قبل بسنة
بعد ما عرفنا كيف تخلي المستأجر ب 3 حركات -.-" لازم نقطة مهمة نقولها
لما ينحكملك بإخلاء المستأجر بينعطى مهلة ما بتقل عن 3 شهور و ما بتتجاوز 6 شهور من وقت ما يصير الحكم قطعي .
رح نختم اليوم المعلومة القانونية إنو العالم بتسمع عن شي اسمو 60 ب 40 % و بطلع المستأجر .. #بطلنا_نأجر وبدنا #ننهي_العلاقة_مقابل_تعويض
هي الفكرة قالتها المادة 12 من قانون الأجار بدعوى بتمكنك من إنهاء العلاقة الإيجارية (( بالنسبة للعقار للسكني )) و يلي مو مأجر للدولة تبع الدولة بسنة 2018 بيصير فيك ترفع هالدعوى من عدا المدارس و الوزارات بس بشرط تدفع تعويض من قيمة العقار هو وفاضي مو مأجر على حسب سعرو بالسوق بناء على كشف محكمة بيعادل 40% بياخدها المستأجر طبعا ضروري نوه انو في مدة محددة لتدفع فيها يا اما بتعتبر متنازل عن الحكم و ما عاد فيك تعيدها قبل 3 سنين .
بالحلقة القادمة رح نحكي عن شو العلاقات الإيجارية المسثنى من هالقانون متل الزراعية ووو ، و رح نحكي عن شو العقوبة الجزائية المفروضة في حال فكرت تطلع المستأجر بطريقة العضلات او الإزعاج
كالعادة #التنويه_هام : الموضوع يطول هاد اختصار ، و البوست مكتوب باللهجة العامية المحكية لسهولة إيصال المعلومة و سلاسة القراءة و إذا كان في خطأ مطبعي نعتذر و أي سؤال جاهز للإجابة .
كلمات مفتاحية :
فروغ - برسم التسليم - محل تجاري اجرة قديم - أجار - إيجار - آجار - زيادة الأجرة السنوية - برسم الاستثمار - دمشق - سورية -
تعليقات
إرسال تعليق
اكتب تعليقك في حال وجود أي استفسار