التزام المحامي بالحفاظ على السرية في سوريا
ما في داعي أبدا لما تبعت للمحامي تسأله عن قضية طلاق أو
جريمة انت متهم فيها أو شي شخصي أو محرج تقول في رفيقي صار معه كذا و كذا و تسأل و
بعدها تحرج حالك و تقول استاذ بصراحة أنا يلي صاير معي هيك !
خايف من المحامي يلي بدو يدافع عنك أو تاخد منه المعلومة
لا تسأله بالأساس ! المحامي هو الشخص الوحيد بعد الست الوالدة يلي مهمته يدافع عنك
بكل الامكانيات المتاحة ، لهيك لازم تكون واضح و صادق و صريح و تحكي كل التفاصيل –
كلن يعني كلن – لا تترك أي معلومة ولو برأيك ثانوية ما تحكيها حتى ما يتفاجئ بنص
الدفاع عنك بشي ممكن يخليك تخسر الدعوى و ولو كنت غلطان قول إنك غلطان و دائما
التزم بالخطة يلي بيحطها المحامي و توجيهاته خصوصي بالتعامل مع الخصم ، و بغض
النظر عن انو المحامي حالف قسم متل الأطباء بالحفاظ على سرية مهنة المحاماة و عدم
مخالفة القوانين تذكر انو المحامي بيهمه سمعته انو كتوم و ثقة بالإضافة إلى انو
شغلته يطلع عالأسرار ليساعدك فعليا متل الطبيب ما في يشخص مرض معين بدون ما يطلع
على العورة إذا لزم الأمر
وهون السؤال في شي اسمه سرية المحادثات بين المحامي و
موكله بالقانون السوري ؟ في حماية إلك في عقوبة على إفشاء السر ؟
طبعاً في أولا فيك تتوجه لتقديم شكوى بحق المحامي بفرع
نقابة المحامين يلي تابع إله المحامي و العقوبات هون بتتدرج من التنبيه للشطب من
جدول المحامين
و هاد الشي منصوص عنه بقانون تنظيم مهنة المحاماة المادة
/85/ يلي نصت : " أ يحاكم تأديبيا أمام مجلس الفرع
كل محام يخرج عن أهداف النقابة أو يخل بواجب من واجبات المحاماة المبينة في هذا
القانون وفي النظام الداخلي أو تصرف تصرفا يحط من كرامة المهنة أو قدرها أو تصرف
في حياته الخاصة تصرفا اقترن بفضيحة شائنة ويعاقب بإحدى العقوبات التأديبية
التالية:
1- التنبيه دون تسجيل أو مع التسجيل وذلك بكتاب يرسل إلى المحامى.
2- التأنيب أمام المجلس.
3- المنع من مزاولة المهنة مدة لا تتجاوز ثلاث سنوات.
4- شطب الاسم من جدول النقابة.
ب- على المجلس بناء على طلب الشاكى الحكم على المحامى بإعادة المبالغ التي يقدر
المجلس أنه استوفاها بغير حق وذلك مع عدم الإخلال بحق الشاكي بطلب التعويض أمام
الجهات القضائية المختصة.
طيب غير هيك ؟ في رادع تاني ؟ في ضرر ممكن يكون
صار كبير بسبب إفشاء الأسرار ، طبعاً عزيزي القارئ فيك تلجئ للقضاء و تشتكي عليه
بجريمة إفشاء الأسرار طبعا بآلية معينة كون المشكو منه محامي و إله حصانة و عقوبة
هي الجريمة حسب المادة 565 من قانون العقوبات بتوصل للسنة حبس و الغرامة.
أخيراً للتزود إيمتى
ممكن المحامي يفش السر بدون أي مسؤولية ؟ لما يكون السر هو مثلاً عم تخطط قدامه
لترتكب جريمة جناية أو جنحة أو بعد ما يكون أخد الإذن منك بنشر المعلومات و
التفاصيل .
أخيراً هيك حالات نادرة
تصير لان المحامي دائما بالإضافة ليلي حكيناه بيهمه سمعته و صيته لهيك لازم تكون
متطمن لما تبعت و لا حياء في العلم و الاستشارة القانونية حتى تحمي حقوق أو تعالج
وضع قانوني أو أزمة مريت فيها .
التنويه :
إن هذا المقال كتب باللهجة العامية المحكية لسهولة إيصال المعلومة و سلاسة القراءة
، وهو عبارة عن مقال مختصر و مبسط للموضوع ، جميع
حقوق الملكية الفكرية محفوظة و في حال نسخ المعلومة يرجى الحفاظ على الأمانة
العلمية بالنقل .
للتواصل مع المحامي الأستاذ كاتب المقال
لمزيد من المعلومات أو الاستشارات القانونية حول الموضوع :
Mobile
: 0948889987
E-Mail
: hussamkreem.d@gmail.com
Facebook
: https://www.facebook.com/hussam.KRE
Twitter
: https://twitter.com/hussamkreem
تعليقات
إرسال تعليق
اكتب تعليقك في حال وجود أي استفسار